Qishda bir million afg‘on bolalari ochlikdan halok bo‘lishi mumkin
Afg‘onistonda ayni vaqtda 8,7 million kishi ocharchilik yoqasida.
Bu haqda BMT tahliliga tayanib “The New York Times” xabar berdi.
Qariyib to‘rt oylik “Tolibon” hukmronligidan so‘ng mamlakat ko‘plab gumanitar inqirozlarga, jumladan, oziq-ovqat tanqisligiga duch kelmoqda.
Dastlabki hisob-kitoblarga ko‘ra, 22,8 million kishi – mamlakat aholisining yarmidan ko‘pi potensial hayot uchun xavf tug‘diruvchi oziq-ovqat yetishmasligidan qiynalmoqda. Bunga qisman "Tolibon" hokimiyatni egallab olishi ortidan kelib chiqqan iqtisodiy tanazzul sabab bo‘lgan. Chunki AQSHning bir guruh jangarilarga qarshi sanksiyalari mamlakatni yakkalab qo‘ygan va xalqaro tashkilotlarga yordam yetkazishni qiyinlashtirgan.
Bundan tashqari, Afg‘onistonda tibbiyot tizimi ham jar yoqasida: "Tolibon" Kobulga bostirib kirganidan so‘ng tibbiy yordam uchun 600 million dollardan ortiq mablag‘ muzlatilgan.
Avvalroq Jahon banki Afg‘onistonga gumanitar yordam uchun mablag‘ ajratgani xabar qilingandi.
