Solih: Tolibon Isroil armiyasidan ham "o‘tib tushdi"
Sobiq prezident Ashraf G‘anining birinchi o‘rinbosari Amrulloh Solih Facebookʼdagi sahifasida Tolibonning yuritayotgan siyosatini qoraladi.
“Tolibonning afg‘on xalqiga ko‘rsatayotgan munosabati bir vaqtlar Isroil armiyasining falastinliklarga qilgan muomalasidan ham yomonroqdir. Biz bu zolim va bo‘ysunmas kuchga nisbatan qarshiligimizni kuchaytirishimiz kerak”, - deb yozgan Solih.
Shuningdek, u Tolibonning ayni vaqtda dunyo hamjamiyatidan kutayotgan yordami haqida ham yozib o‘tgan:
“Tilanchilik kechagi yechim emas, u bugun ham yechim bo‘lolmaydi”.
Amrulloh Solihning fikricha, Tolibon demokratik yo‘l, shuningdek, din bilan Pokistonning Afg‘onistondagi strategik taʼsirini kengaytirish quroli sifatida foydalangan. Bu yo‘lda esa har ikki tomondan minglab yoshlar o‘ldirilgan.
“Tolibonning bir toifasi dunyoga muhtoj emasligini aytsa, ikkinchisi AQSHni “siyosiy qibla” va “insoniy axloq taxti” deb ataydi. O‘rtada esa bahs, diniy qarashlar haqida hech qanday gap yo‘q”, - degan sobiq prezident o‘rinbosari o‘zining ijtimoiy tarmoq sahifasida.
Avvalroq Afg‘oniston prezidenti xalqqa murojaat qilgani hamda Ahmad Masʼudning - “Biz butun Afg‘oniston uchun kurashyapmiz” – deya aytganlari haqida xabar berilgandi.
Olamgir Abdiyev
