Bo‘stonliq va Zominda o‘rmon yong‘inlarini bartaraf etuvchi otryadlar tashkil etiladi
O‘zbekistonda favqulodda vaziyatlarning oldini olish va bartaraf etishning samarali tizimi yaratiladi.
Bu haqda 2022–2026 yillarga mo‘ljallangan taraqqiyot strategiyasining 2022-yilda amalga oshirish bo‘yicha “Yo‘l xaritasi” loyihasida belgilangan.
Hujjat loyihasiga ko‘ra, Bo‘stonliq va Zomin tumanlarida Favqulodda vaziyatlar vazirligining o‘rmon yong‘inlarini bartaraf etishga ixtisoslashgan otryadlarini tashkil etish va faoliyatini yo‘lga qo‘yish ko‘zda tutilgan.
Bundan tashqari, o‘rmon yong‘inlarini bartaraf etishga ixtisoslashgan idoraviy bo‘linmalar yong‘in o‘chirish asbob-anjomlari va texnikasi bilan bosqichma-bosqich jihozlanadi.
Mahalliy sharoitlarda ishlab chiqarish imkoniyatiga ega yong‘in-texnik vositalar va ishlab chiqaruvchilar ro‘yxatini shakllantirish, davlat standartlari asosida xususiy sektorni jalb etgan holda yong‘in-texnik vositalarini ishlab chiqarish yuzasidan tadqiqotlarni yo‘lga qo‘yish rejalashtirilgan.
Maʼlumot uchun: Jizzax viloyatining Zomin tumani “Duoba” qishloq fuqarolar yig‘ini O‘riklisoy qishlog‘i yaqinidagi o‘rmon hududlarida 2021 yil 1 avgust kuni yirik yong‘in yuz bergandi.
Soat taxminan 10:40 da boshlangan yong‘in salkam 8 soatdan so‘ng o‘chirilgan. FVV maʼlumotlariga ko‘ra, 80 gektar maydonda quruq o‘t va daraxtlar yongan.
Olovni o‘chirishga 1600 ga yaqin odam jalb etilgan. Keyinroq Prezident Shavkat Mirziyoyev yong‘in “bir boyvachchaning o‘g‘li” sabab sodir etilganini maʼlum qilgandi.
Eslatib o‘tamiz, avvalroq Zomin tog‘laridagi o‘rmon yong‘ini aholi punktiga yaqin kelayotgani aytilgani hamda Qashqadaryodagi mebel korxonasida yong‘in yuz berdi, 3 kishi halok bo‘lgani haqida xabar berilgandi.
Cho‘lponoy Ahmedova
