Qurilish sohasidagi qatʼiy talablar soddalashtiriladi

 

Adliya vazirligi tomonidan ishlab chiqilgan Prezidentning “Qurilish sohasiga oid talablarni soddalashtirish hamda texnik jihatdan tartibga solish sohasidagi normativ hujjatlarni tizimlashtirish chora-tadbirlari to‘g‘risida”gi qarori loyihasi jamoatchilik muhokamasini o‘tkazish uchun Normativ-huquqiy hujjatlar loyihalari muhokamasi portaliga joylashtirilgan.

 

Bu haqda Adliya vazirligi Jamoatchilik bilan aloqalar bo‘limi maʼlum qildi. 

 

Mazkur loyihada quyidagilar nazarda tutilgan:

 

— shaharsozlik normalari va qoidalarini birlashtirish yo‘li bilan tizimlashtirish, bugungi kunda o‘z ahamiyatini yo‘qotgan hujjatlarni bekor qilish;

— qurilish obyektining yakuniy holatiga bo‘lgan talablarni belgilab beruvchi qurilishni normalashning parametrik usulini qo‘llash;

— qurilish sohasida narxlarni shakllantirishda asos bo‘luvchi smeta qoidalarini smeta normativlari shaklida tasdiqlash va ochiqlikni taʼminlash;

— qurilish sohasidagi o‘zini o‘zi boshqaruvchi notijorat tashkilotlarga aʼzo bo‘lish tartibini joriy etish orqali arxitektura-shaharsozlik hujjatlarini ishlab chiqish bo‘yicha faoliyatni litsenziyalash tartibini bekor qilish;

— qurilish sohasidagi yakka tartibda uy-joy qurish (rekonstruksiya qilish) bo‘yicha loyiha-smeta hujjatlarini kelishish bo‘yicha davlat xizmatlari ko‘rsatish tartibini bekor qilish;

— xususiy sektordagi yuridik shaxslarga qurilish-montaj ishlarida qurilish nazoratini amalga oshirish huquqini berish;

— texnik jihatdan tartibga solish sohasidagi normativ hujjatlarni O‘zbekiston Respublikasi qonunchilik maʼlumotlari milliy bazasiga tizimli ravishda joylashtirilishini taʼminlash;

 

— sunʼiy yo‘ldosh va boshqa uchuvchisiz uchish apparatlari orqali yerni masofadan zondlash va yo‘ldoshli aloqa kosmik apparatlarini qo‘llash orqali qurilishda shaharsozlik normalari va qoidalariga rioya etilishi monitoring qilish tartibini takomillashtirish;

 

— innovatsion jarayonlarini, yangi turdagi materiallar va mahsulotlarni sinovdan o‘tkazishga mo‘ljallangan “Trial pool” – sinov maydonini tashkil etish.

 

Eslatib o‘tamiz, avvalroq Shavkat Mirziyoyev qurilish sohasiga sarflangan har bir so‘m egasigacha to‘liq yetib borishi zarurligini bildirgani hamda davlatimiz rahbari har bir hududda uy-joy qurilish klasterlari tashkil qilinishi haqida xabar berilgandi.

 

Cho‘lponoy Ahmedova