Benzin narxi arzonlashmadimi?
“O‘zbekneftgaz” ijtimoiy tarmoqlarda tarqalgan xabarlar yuzasidan rasmiy bayonot berdi.
Ijtimoiy tarmoqlarda avtobenzin narxi arzonlashganiga oid xabarlar tarqatildi va bu holat internet foydalanuvchilari va iste’molchilar o‘rtasida keng muhokamalarga sabab bo‘ldi. Mazkur xabar bo‘yicha “O‘zbekneftgaz” matbuot xizmati rasmiy munosabat bildirib, tarqatilgan xabarlar asossiz ekanini ma’lum qildi.
Qayd etilishicha, avtobenzin taqchilligi oldini olish, iste’molchilar talab va takliflariga binoan narxlarning arzonlashtirilishi bosqichma-bosqich amalga oshiriladi. Bu borada “O‘zbekneftgaz” AJ, Monopoliyaga qarshi kurashish qo‘mitasi va “Tovar xomashyo birjasi” AJ hamkorligida chora-tadbirlar bajarilmoqda.
“Bugungi kunda “O‘zbekneftgaz”ga qarashli “UNG Petro” korxonasi AYQSHlarida benzin 6500 so‘mdan sotib kelinmoqda. Respublika hududidagi “O‘zbekneftgaz”ning barcha AYQSHlarda benzin shu belgilangan narxda sotilishi ta’minmoqda”, – deyiladi xabarda.
Avvalroq AI-80 markali benzin narxi 9,5 foizga arzonlashgani haqida xabar berilgandi.
Javohirbek Tursunov
