Монополияга қарши курашиш қўмитаси ахборот хизмати хабар беришича, 15-19 ноябрь кунлари товар-хом ашё биржасида ўтказилган очиқ биржа савдолари якунларига кўра АИ-80 маркали автомобиль бензиннинг ўртача сотилиш нархлари маҳсулотнинг бир тоннаси учун 10 миллион 129,4 минг сўмдан 9 миллион 168,4 минг сўмгача ёки 9,5 фоизга пасайган.
Қайд этилишича, турли манбаларда келтиришича автомобиль бензиннинг 1 тоннаси ўртача 1293-1370 литрни ташкил қилади. Жорий йилнинг 15-19 ноябрь кунлари биржа савдоларига қўйилган АИ-80 маркали автомобиль бензини савдоларида 556 та тадбиркорлик субъектлари иштирок этиб, ўтган ҳафтага (249 та) нисбатан ушбу кўрсаткич 2,2 баробарга ошган.
Биржа савдоларига қўйилган АИ-80 маркали бензиннинг 1 тонналик лотлар бўйича иштирокчилар талаби жорий йилнинг 19 ноябрь куни 1 857 тоннани ташкил этиб, 16 ноябрь кунига нисбатан кунлик талаб 310 тоннага ошган.
Бунда кичик ҳажмдаги лотлар бўйича савдоларда иштирок этаётган харидорлар сони 345 тани ташкил этиб, улар умумий савдо иштирокчиларининг 62 фоизига тўғри келган.
Маълумот учун: ҳафта якунига кўра биржа бозорининг мазкур сегментида таклиф даражаси 3,1 фоизга ўсган.
Эслатиб ўтамиз, биржа савдоларига қўйилган бензин ҳажмида кичик 1 тонналик лотларнинг улуши 6 фоиздан 30 фоизгача оширилган. Бунинг натижасида бензин сотиб олган харидорларнинг сони 32 тадан 143 тагача, яъни 4,5 баробарга ўсган.
Аввалроқ Ўзбекистонда энг кўп бензин қайси ҳудудда ишлаб чиқарилгани маълум бўлганди. Шу билан бирга, Аi-80 нархи нега ушлаб турилгани, автомобиль бензини қайси ойда кўп ишлаб чиқарилгани ҳамда “Нефть ўзимизники, завод ўзимизники, нега бензиннинг нархи “ўзимизники” эмас?” номли мақола тақдим этилганди.