Endi ichki musobaqalarda Xorazm jamoasi kuchli nazorat qilinadi
Bugun xorazmlik og‘ir atletikachida taqiqlangan modda borligi aniqlandi.
Yaqin yillar ichida o‘zbekistonlik sportchilar orasida doping holatlari tez-tez aniqlanmoqda. Milliy antidoping agentligi tomonidan o‘tgan 9 oy davomida barcha sport turlari bo‘yicha o‘zbekistonlik sportchilardan 312 ta doping-sinamalar olindi va 4 ta sportchi taqiqlangan modda iste’mol qilganligi aniqlangan.
Bugun ham O‘zbekiston Milliy antidoping agentligi huzuridagi Axloq komissiyasining qaroriga ko‘ra, og‘ir atletikachimiz Maftuna Ismoliovada 2021 yil noyabr oyida musobaqadan tashqari davrda olingan doping-sinamasidan taqiqlangan “OXANDROLONE” va “STANOZOLOL” moddalari borligi ma’lum bo‘ldi.
Mazkur holat bo‘yicha O‘zbekiston og‘ir atletika federasiyasi mabuot xizmati rahbari Omonjon To‘xtamirzayev quyidagilarni Zamon.uz'ga ma’lum qildi.
“Bu holat bo‘yicha Federasiya vise-prezidenti Shaxrillo Maxmudov ham alohida ta’kidlab o‘tgan. Butun respublika bo‘ylab, chekka-chekka qishloqlardagi sportchilarda doping bo‘yicha holatlar hech kimga foyda keltirmasligi hamda terma jamoaga jalb qilingan atletlar to‘liq nazoratda bo‘lishini, agarda sportchida doping aniqlansa, bu o‘zbek og‘ir atletikasiga salbiy ta’sir qilishi, ish hattoki Olimpiada lisenziyasi kamaytirilishigacha borishi mumkinligini aytib ogohlantirgan”.
Omonjon To‘xtamirzayev Maftuna Ismoilovada aniqlangan doping bo‘yicha quyidagilarni aytib o‘tdi.
“Maftuna bo‘yicha unaqa qiziq gap ham yo‘q. U Respublika chempionatida Xorazm nomidan qatnashgan, terma jamoa a’zosi emas. Shu sababli uning doping testida taqiqlangan moddalar topilgani terma jamoaga ta’sir qilmaydi. Viloyatlarda ba’zi murabbiylar shogirdi respublika va boshqa musobaqalarda natija qayd etishidan (moddiy jihatdan ham) manfaatdor. Shuning uchun baьzilar maqsadga boshqa yo‘ldan borishadi. Endi ichki miqyosda Xorazm jamoasi vakillarini avvalgidan ham kuchliroq nazorat qilinadi. Qolganlarga ommaviy jazo bo‘lmaydi”.
Shu tariqa antidoping agentligining ma’lumotiga ko‘ra Maftuna Ismoilova Butunjahon antidoping kodeksining 2.1-moddasida ko‘zda tutilgan antidoping qoidabuzarligi uchun 2021 yil 23 dekabrdan boshlab, 2025 yil 22 dekabrga qadar 4 yil muddatga diskvalifikasiya qilindi.
