Ukraina mudofaa vaziri: BMT faoliyatini to‘xtatishi kerak
Shuningdek, u yangi xalqaro institutlar tuzish vaqti kelganini aytgan.
Yevropa xavfsizlik va hamkorlik tashkiloti (YEXHT) va BMT boshqa samaraliroq institutlarga almashtirilishi kerak. Bu haqda Ukraina mudofaa vaziri Aleksey Reznikov maʼlum qildi.
Reznikovning The Wall Street Journal gazetasiga yozgan maqolasida shu haqda so‘z boradi.
"Bu tashkilotlar barbod bo‘ldi. Ularga qadar faoliyat yuritgan Millatlar Ligasi kabi, ushbu tuzilmalar ham yangi va samaraliroq, faqatgina o‘ta qudratli davlatlar emas, balki barcha mamlakatlar manfaatlariga xizmat qiladigan xalqaro institutlarga almashishi kerak", — deb qayd etgan vazir.
U yangi tuzilmada tahdidlarga avtomatik munosabat bildirish mexanizmi bo‘lishini taklif qilgan. Unga ko‘ra, har qanday agressor nizo boshlanishi bilan oldindan tayyorlab qo‘yilgan sanksiyalar orqali jazolanadi. Reznikovning so‘zlariga ko‘ra, agar shu kabi choralar Rossiyaga qarshi oldindan ko‘rilganda edi, hozir vaziyat butunlay boshqacha bo‘lgan bo‘lardi.
Avvalroq Yaponiya bosh vaziri Fumio Kisida yangi dunyo tartibotini yaratish vaqti kelganini aytgandi.
