Imron Xonga qarshi fitna bo‘lmagan — Pokiston milliy xavfsizlik qo‘mitasi
Avvalroq sobiq bosh vazir AQSHni o‘ziga qarshi harakatlarda ayblagandi.
Pokiston milliy xavfsizlik qo‘mitasi sobiq bosh vazir Imron Xonning lavozimidan chetlashtirishda xorijiy davlatlar ishtiroki bo‘lmaganini maʼlum qildi.
Bu haqda yangi hukumat rahbari Shahboz Sharif administratsiyasi tarqatgan press-relizda so‘z boradi. Sharif 22 aprel kuni Milliy xavfsizlik qo‘mitasi yig‘ilishiga rahbarlik qilgan. Unda mart oyi oxirida Pokistonning Vashingtondagi elchixonasiga kelib tushgan telegramma muhokama qilingan.
Mamlakatning AQSHdagi sobiq elchisi Asad Majid Xon yig‘ilish qatnashchilarini bu telegramma mazmuni bilan tanishtirgan. Bundan oldin ushbu maktubda Qo‘shma Shtatlar rasmiylarining Imron Xon hukumatiga qarshi tahdidlari yozilgani to‘g‘risida xabarlar tarqalgan.
"Milliy xavfsizlik qo‘mitasi telegramma mazmunini o‘rganib, tahlil qilgan holda hech qanday chet el fitnasi bo‘lmagani to‘g‘risida xulosaga keldi", — deyiladi press-relizda.
Imron Xon 10 aprel kuni lavozimidan chetlatiladi. U Pokiston tarixida ishonchsizlik votumi eʼlon qilingan birinchi bosh vazir. Isteʼfodan oldin u AQSH va mahalliy muxolifat unga tahdidlar bilan to‘la maktub yozganini eʼlon qilgandi.
Avvalroq Vashington Islomobodda hukumat almashganiga munosabat bildirgandi.
