AQSH Suriya shimoliga investitsiya kiritishga ruxsat berdi
Shu bilan birga bu tartib Bashar Asad nazoratidagi hududlarga joriy etilmaydi.
Payshanba kuni AQSH Suriya shimolidagi hududlarga ayrim xorijiy investitsiyalarni kiritishga ruxsat berdi. bu haqda “Reuters” agentligi xabar berdi.
Vashington bu orqali ISHID taʼsiri qayta tiklanishini oldini olmoqchi. Moliya vazirligi 12 yo‘nalish, xususan, qishloq xo‘jaligi, qurilish va moliya sohalariga sarmoya kiritilishiga ruxsat berdi. Ammo bu tartib Suriyaning Bashar Asad tomonidan nazorat qilinadigan hududlariga amal qilmaydi.
Ko‘plab tahlilchilar Rossiya-Ukraina mojarosi va Xitoy tomonidan kuchayib borayotgan chaqiriqlar fonida AQSHning Suriyadagi siyosati ISHIDning qayta tiklanishini oldini olish va moliyaviy yordamni ko‘paytirishga qaratilganini qayd etdi. Qo‘shma Shtatlar rasmiylari so‘zlariga ko‘ra, odamlar uchun iqtisodiy imkoniyatlarning kengaytirilishi ularning turli terroristik va ekstremistik guruhlar taʼsiriga tushib qolishining oldini olishi mumkin.
“Bu rayonlarga xususiy sektor investitsiyalarini jalb qilish ISHIDning og‘ir sharoitlarga tushib qolgan odamlarning yollash va shu orqali terroristik tuzilmani saqlab turish imkoniyatidan mahrum etadi”, – degan AQSH administratsiyasi vakili.
Uning qo‘shimcha qilishicha, hozirda ayrim xorijiy kompaniyalar Suriya shimoliga sarmoya kiritishga qiziqish bildirgan, ammo ularning nomi keltirilmagan.
Shu bilan birga, Bashar Asadga qarshi sanksiyalar bekor qilinmasligi taʼkidlangan.
Moliya vazirligi tomonidan taqdim etilgan litsenziya rasmiy Suriya hukumati yoki sanksiyalar ostidagi shaxslar bilan kelishuvlarsiz mamlakat shimolida ishlab chiqarilgan neft mahsulotlari sotib olishga ham imkon beradi. Ammo Suriya nefti yoki neft mahsulotlarining AQSHga import qilish taqiqlangan.
Avvalroq Vashington Suriyaga qarshi sanksiyalarni uzaytirgandi.
