"Neft-gaz tarmog‘iga investitsiyalar zarur" — "Saudi Aramco" rahbari
Dunyoning eng yirik neft kompaniyasi direktori “yashil” energetikaga o‘tish rejasini qayta ko‘rib chiqishga chaqirdi.
Energetika bozoridagi vaziyat “yashil” energetikaga o‘tish rejasini qayta ko‘rib chiqishni talab qilmoqda. Bu haqda Saudiya Arabistonining "Saudi Aramco" milliy neft kompaniyasi rahbari Amin Nosir maʼlum qildi.
“Joriy inqiroz butun dunyoda neft va gaz qazib olishda zaхira quvvatlarining yetishmayotganini ko‘rsatadi. 2050 yilga kelib, to‘liq “yashil energetika”ga o‘tishni o‘rniga, biz dunyoni yana-da ko‘proq ko‘mirdan foydalanishga majbur qilyapmiz va energetika xavfsizlik, narxlarning maqbulligi hamda energotashuvchilarning mavjudligiga eʼtibor qaratmayapmiz”, – degan u "Financial Times" nashriga bergan intervyusida.
Nosirning qo‘shimcha qilishicha, narxlar tushgan taqdirda ham neft qazib olish hajmi kuniga 100 million barreldan oshmaydi. Shu bilan birga u bozordagi barqarorlikni saqlab qolish uchun neft-gaz tarmog‘iga investitsiya kiritish zarurligini taʼkidlagan.
Avvalroq Saudiya Arabistoni yangi OPEC+ kelishuvini tayyorlayotgani to‘g‘risida xabar berilgandi.
