O‘zbekistonda etnosport turlari bo‘yicha musobaqalar o‘tkaziladi
Bu bo‘yicha Prezident qarori qabul qilindi.
25 may kuni “Etnosport turlarini ommalashtirish va rivojlantirish chora-tadbirlari to‘g‘risida”gi Prezident qarori qabul qilindi. Bu haqda “Huquqiy axborot” telegram kanali xabar berdi.
Qaror bilan Etnosport turlarini 2025 yilgacha ommalashtirish va rivojlantirish dasturi, shuningdek, uni 2022–2023 yillarda amalga oshirish bo‘yicha “yo‘l xaritasi” tasdiqlandi. Shunga ko‘ra, 2023 yil 1 martdan har yili etnosport turlari bo‘yicha musobaqalar o‘tkaziladi.
2023 yildan boshlab an’anaviy tarzda Toshkent shahrida har yili bir marotaba etnosport turlari bo‘yicha “Uzbekistan Ethno Games” respublika festivali. Xiva shahrida har ikki yilda bir marotaba Xalqaro etnosport festivali tashkil qilinadi.
2022/2023 o‘quv yilidan Respublika estrada sirk kollejida polvonlik va dorbozlik san’ati yo‘nalishida o‘rta bo‘g‘in kadrlari tayyorlanadi.
2023 yildan har ikki yilda bir marotaba polvonlar va dorbozlar ishtirokida “Polvonlar sulolasi” ko‘rik-tanlovi o‘tkaziladi. Shuningdek, YUNESKO tashkilotidan nomoddiy madaniy meros maqomi olinishi mumkin bo‘lgan etnosport turlari ro‘yxati shakllantiriladi.
2023 yil 1 yanvargacha har bir hududda ot sporti turlariga tegishli anjomlar savdosini yo‘lga qo‘yish maqsadida do‘konlar tashkil etiladi.
