KXDR Janubiy Koreya harbiy o‘quv qo‘llanmasida “dushman” sifatida qayd etildi
Bunga qadar Pxenyan “real harbiy tahdid” sifatida baholab kelingan.
Janubiy Koreya mudofaa vazirligi o‘quv materiallarida KXDR “dushman” sifatida qayd etildi. Bu haqda Yonhap agentligi xabar berdi.
“Shimoliy Koreyaning provokatsiyalari bizning xavfsizligimizga tahdid tug‘diradi. Bu tahdidlar saqlanib qolar ekan, KXDR armiyasi va rejimi bizning dushmanlarimiz”, – deyilgan ofitser va askarlar uchun mo‘ljallangan o‘quv materiallaridan birida.
Ushbu qo‘llanma 9 may kuni tarqatilgan. Unga qadar mamlakat mudofaa vaziri Li Chjon Sop KXDRni ehtimoliy dushman deb atagandi.
Yonhap agentligi maʼlumotlariga ko‘ra, Janubiy Koreyaning avvalgi prezidenti Mun Chje In va uning administratsiyasi diplomatik sabablarga ko‘ra, Pxenyanni dushman deb atamagan va “real harbiy tahdid” sifatida baholab kelayotgandi. O‘z navbatida amaldagi prezident Yun Sok Yol KXDRga qarshi qattiqroq pozitsiya egallashini ochiq maʼlum qilgan.
Yil boshidan buyon Shimoliy Koreya 17 bor raketa sinovlari o‘tkazgan. So‘nggi marotaba 25 may kuni ballistik raketa uchirilgan. Bunga javoban Seul va Vashington o‘z raketa tizimlari ishtirokida mashg‘ulot o‘tkazdi.
AQSH Shimoliy Koreyaning yirik xakerlar guruhiga sanksiya qo‘ymoqchi ekanligi to‘g‘risida xabar berilgandi.
