Moldaviya Yevropa bilan qurol yetkazib berish masalasini muhokama qilyapti
Avvalroq NATO Moldaviyaga harbiy yordam ko‘rsatishni ko‘rib chiqayotgani maʼlum bo‘lgandi.
Moldaviya Yevroittifoq davlatlari bilan armiyani zamonaviy qurollar bilan taʼminlash masalasida muzokara olib bormoqda. Bu haqda mamlakat bosh vaziri Natalya Gavrilitsa maʼlum qildi.
“Biz neytrallikni saqlab kelmoqdamiz. Ammo bu izolyatsiyani anglatmaydi. Neytrallik fuqarolar xavfsizligini taʼminlashni ham anglatadi. Biz xavfsizlik haqida qayg‘urishimiz va milliy armiyani modernizatsiya qilishimiz lozim”,– degan u Moldova 1 telekanaliga bergan intervyusida.
Siyosatchining qo‘shimcha qilishicha, YEI bilan hozirda ushbu masalada muzokaralar ketmoqda.
Bundan oldin Buyuk Britaniya tashqi ishlar vaziri Liz Trass NATOning Moldaviyaga qurol yetkazib berish imkoniyatini ko‘rib chiqayotganini aytgandi.
Avvalroq Ukraina tashqi ishlar vaziri G‘arbni ko‘proq qurol jo‘natishga chaqirgandi.
