Samarqand shahrida serqatnov ko‘cha yopildi
Shahar hokimligi cheklov sababini ma’lum qildi.
Samarqand shahrining Bo‘stonsaroy ko‘chasida asfalt qoplamasini yotqizish ishlari olib borishi munosabati bilan transport vositalarining harakati vaqtincha cheklanadi. Bu haqda shahar hokimligi axborot xizmati ma’lum qildi.
Qayd etilishicha, Bo‘stonsaroy ko‘chasining “Universitet” xiyobonidan Rudakiy ko‘chasi kesishmasigacha ish olib boriladigan qismi vaqti-vaqti bilan yopiladi.
Ushbu ko‘chada transport vositalarining harakati serqatnov bo‘lgani bois asfalt yotqizish ishlari dam olish kunida olib boriladi va avtomobillar harakati tez orada to‘liq tiklanadi.
Eslatib o‘tamiz, bundan oldin Toshkent shahrining Mirobod tumanida sport marafoni o‘tkazilishi munosabati bilan 6 ta chorrahada avtomobillar harakati 2 soatga cheklanishi xabar qilingandi.
Javohirbek TURSUNOV
