Ukraina va Yevropada ayrim turdagi o‘q-dorilar zaxirasi kamaygan
Bu haqda The Economist maʼlum qildi.
Ukraina va Yevropa Ittifoqi davlatlarida Sobiq Ittifoq va Rossiya tomonidan ishlab chiqarilgan o‘q-dorilar tugab bormoqda. Bu haqda The Economist xabar berdi.
Nashr Amerika harbiy-dengiz tahlili markazining RF qurolli kuchlarini o‘rganish dasturi rahbari Maykl Kofman maʼlumotlariga asoslangan. Unga ko‘ra, Ukrainada ayrim turdagi Sovet davrida ishlab chiqarilgan o‘q-dorilar butunlay tugagan yoki tugash arafasida. Bu vaqt o‘tishi bilan Sharqiy Yevropa davlatlarida ham yuz beradi. Ukrainada nizo cho‘zilib borar ekan, NATO standartidagi qurollarga talab oshib boradi.
The Economist ‘ning harbiy kuzatuvchisi Shashank Djoshining maʼlumotlariga ko‘ra, Yevropada Sobiq SSSR davridan qolgan o‘q-dori zaxiralari jiddiy kamaygan. U bilan suhbatlashgan harbiy amaldorlardan biri uch oyda ular deyarli tugab bo‘lganini qayd etgan. Uning qo‘shimcha qilishicha, inflyatsiyaning oshib borishi barcha turdagi qurol-aslahalarning qimmatlashishiga olib keladi.
Bundan tashqari, Yevroittifoqda tankka qarshi raketalar va ko‘chma zenit tizimlari ham oxirlab qolgan. Yaqin kelajakda ularning tezkor ravishda ishlab chiqarilishini yo‘lga qo‘yish esa qiyin masala bo‘lib qolmoqda. Bu esa Ukrainani Yevropa qurollari bilan barqaror taʼminlanishiga taʼsir o‘tkazadi.
Avvalroq Kiyev Polsha bilan qurol sotib olish bo‘yicha bitim imzolagandi.
