Afg‘oniston xalqi o‘z tarixidagi eng fojiali davrni boshdan kechirmoqda —BMT
Necha foiz afg‘on oilalari ochlik yoqasida ekanligi maʼlum qilindi.
BMT yana bir bor Afg‘onistondagi og‘ir gumanitar va iqtisodiy inqirozdan ogohlantirdi.
“Gumanitar va iqtisodiy inqiroz hamon afg‘onlar hayotiga halokatli taʼsir o‘tkazmoqda. Bugun, o‘sib borayotgan ishsizlik sharoitida, 93 foiz oilalar oziq-ovqat yetishmovchiligiga duch kelmoqda. Bu ayniqsa, aholining eng qashshoq va nozik qatlamlari — ayollar boshchilik qiladigan oilalar, qari insonlar, nogironlar va bolalarga salbiy taʼsir ko‘rsatmoqda. Afg‘oniston aholisining qariyb yarmi — 19.7 million kishi ochlik yoqasida”, – degan BMTning inson huquqlari bo‘yicha oliy komissari Mishel Bachelet.
Shuningdek, u kplab afg‘onistonliklar malakali tibbiy xizmatdan uzilib qolganini taʼkidlagan. JSST maʼlumotlariga ko‘ra, ularning soni 18.1 milliondan ortadi.
Bundan tashqari, Bachelet “Tolibon”ni ayollar, jurnalistlar va huquq himoyachilari taʼqib qilish hamda huquqini kamsitish siyosatidan voz kechishga chaqirgan.
“Afg‘oniston xalqi ushbu avlod hayotidagi eng fojiali davrni boshdan kechirmoqda”, – deb qayd etgan oliy komissar.
Avvalroq Sobiq afg‘on amaldorlarining dabdabali hayot kechirayotgani to‘g‘risida xabar berilgandi.
