Собиқ афғон амалдорлари шоҳона ҳаёт кечирмоқда — WSJ
Афғонистон аҳолисининг 55 фоизи эса очликдан азият чекмоқда.
2021 йил августида чет элга чиқиб кетган Афғонистон собиқ ҳукумати амалдорлари шоҳона ҳаёт кечирмоқда. Бу ҳақда The Wall Street Journal хабар берди.
Уларнинг айримлари БАА ва Туркиянинг қиммат туманларида яшамоқда. Хусусан, собиқ президент Ашраф Ғани дастлаб Абу-Дабидаги St. Regis меҳмонхонаси, унинг рафиқаси эса доимий яшаш учун хусусий виллани танлаган. БАА вакилининг WSJ’га берган маълумотига кўра, Ғани ва унинг оиласи “гуманитар сабабларга” кўра мамлакатга киритилган.
Хорижга қочганларнинг кўпчилиги “Толибон” томонидан тазйиқ ўтказилишидан қўрқиб Афғонистондан чиқиб кетган. Аммо айрим амалдорлар, хусусан, собиқ президент Ҳамид Карзай ва собиқ вице-президент Абдулла Абдулла Кобулда қолган ва толиблар томонидан деярли босимга учрамаяпти.
Аммо қочиб кетганлар орасида ўта дабдабали ҳаёт кечираётганлар бор. Хусусан, Ғанининг миллий хавфсизлик масаласи бўйича маслаҳатчиси бўлиб ишлаган Ҳамидулла Моҳиб Буюк Британия фуқароси ҳисобланади, унинг рафиқаси эса ақш фуқароси. У августда рафиқаси ҳомиладор бўлганини ва шу сабабли Абу-Дабидаги Shangri-La меҳмонхонасига келганини қайд этган. Кейинроқ улар Флоридадаги уйга кўчиб ўтган. Ушбу вилла Моҳибнинг қайнонаси номига расмийлаштирилган. Унинг ўзи ҳеч қандай мулкка эга эмаслигини айтган.
Ғанининг яна бир тарафдори ва собиқ молия вазири бўлган Эклил Ҳакимий Калифорнияда ўндан ортиқ кўчмас мулкка эгалик қилиши аниқланган. уларнинг умумий миқдори 10 миллион доллардан ортиққа баҳоланган.
Республика тузумининг энг сўнгги молия вазири Холид Поянда Вашингтон яқинидаги икки уйга эгалик қилади. Улардан бири нақд пулга сотиб олинган. уйларнинг умумий миқдори 1 миллион долларга тенг.
Собиқ иқтисодиёт вазири Мустафо Мансурнинг Дубайда яхталар тўхташ жойи яқинида квартираси борлиги аниқланди.
Аввалроқ Афғонистон аҳолисининг 55 фоизи очликдан азият чекаётгани тўғрисида хабар берилганди.
