Samarqandlik fuqaro davlatga 3,5 mlrd so‘mlik zarar yetkazdi
U ohak pishirish pechlarida tabiiy gazdan noqonuniy foydalangan.
Samarqand viloyatining Kattaqo‘rg‘on tumanida tabiiy gazdan noqonuniy foydalanish holati aniqlandi. Bu haqda Bosh prokuratura huzuridagi Iqtisodiy jinoyatlarga qarshi kurashish departamenti xabar berdi.
Qayd etilishicha, Departamentning Kattaqo‘rg‘on tuman bo‘limi hamda “Hududgaz Samarqand” gaz ta’minoti filiali mutaxassislari hamkorligida tergovga qadar tekshiruv o‘tkazilgan. Unda “Mirzo Ulug‘bek” MFY hududidagi noturar binoda fuqaro S. X. gazlashtirish uchun hujjatlarni rasmiylashtirmasdan, tabiiy gaz tarmog‘iga noqonuniy ulanib, 4 dona ohak pishirishga mo‘ljallangan qo‘lbola yasalgan pechlarga 10 dona nostandart gaz yondirgichlarini o‘zboshimchalik bilan o‘rnatib ishlatganligi aniqlangan. Buning natijasida davlat va jamiyat manfaatlariga 3,5 mlrd so‘m zarar yetkazilgan.
Mazkur holatlar yuzasidan Jinoyat kodeksining 185-2-moddasi (elektr, issiqlik energiyasi, gaz, vodoprovoddan foydalanish qoidalarini buzish) bilan jinoyat ishlari qo‘zg‘atilib, tergov harakatlari o‘tkazilmoqda.
Eslatib o‘tamiz, bundan oldin Navoiy viloyatidagi ohak ishlab chiqarish sexida tabiiy gazdan noqonuniy foydalanish holati aniqlangandi. Oqibatda davlat va jamiyat manfaatlariga 295 mln so‘mlik zarar yetkazilgan.
