Toshkent metorosida yo‘lovchi qaytim yo‘qligi sabab kassadan qaytarildi
Holat bo‘yicha metropoliten uzr so‘rab chiqdi.
Ijtimoiy tarmoqda yo‘lovchilardan biri shoshilib “Turkiston” metro bekatiga tushgani va kassaga ellik ming so‘m pul berib, chipta olmoqchi bo‘lganida operator qaytim yo‘qligi sabab uni ortga qaytargani haqida xabar tarqaldi. Mazkur holatga Toshkent metropoliteni munosabat bildirdi.
Ma’lum qilinishicha, Toshkent metropolitenidagi kassa operatorlari navbatchilik asosida faoliyat yuritishadi. Holat yuz bergan vaqtda operator kunduzgi navbatchilikni qabul qilayotgan bo‘lib, navbatchilik almashilganidan so‘ng doimiy ravishda kassadagi mavjud pullar metropoliten yo‘riqnomasiga asosan olib ketiladi. Kunlik pul aylanmasidan kelib chiqilib qaytim uchun kassada yuz ming so‘m naqd pul fondi qoldiriladi.
Xususan, kelgan ilk yo‘lovchilarning biri yuz ming so‘m, yana biri esa ellik ming so‘m kupyura berib, chipta harid qilgani uchun kassada qaytim uchun yetarli mablag‘ qolmagan. Shuningdek, jami 3,5 daqiqa vaqt ichida katta operator bekatning ikkinchi vestibyulidan qaytim uchun pul olib kelgan.
“Keltirilgan noqulaylik uchun yo‘lovchilardan uzr so‘raymiz”,— deyiladi xabarda.
