Baydenning Saudiyaga tashrifi G‘arb OAVlarida qanday yoritildi?
AQSH rahbari o‘tgan haftada Yaqin Sharq davlatlariga safar qilgandi.
O‘tgan haftaning eng muhim siyosiy voqealaridan biri Jozef Baydenning Saudiya Arabistoniga tashrifi bo‘ldi. Saylovoldi dasturida Saudiyani “quvg‘indi davlat”ga aylantirishga vaʼda bergan AQSH yetakchisi mamlakat rahbari Salmon bin Abdulaziz va valiahd shahzoda Muhammad bin Salmon bilan muzokara o‘tkazdi.
Baydenning ushbu safari tafsiotlari bir necha kundan buyon keng muhokamalarga sabab bo‘lmoqda. Quyida yetakchi G‘arb OAVlarida tashrifning yoritilishiga doir ayrim maʼlumotlar keltiriladi.
New York Post
“Bu sizga yoqadimi yo‘qmi — ammo Vashington va Ar-Riyod bir-biriga muhtoj. Bu esa ikki davlat yetakchilarining juda ko‘p narsalarni ichga yutishga majbur qiladi”.
New York Times
“AQSH prezidentining Muhammad bin Salmon bilan uchrashish to‘g‘risidagi qarori qo‘plab huquq himoyachilari va qotillik qurboni bo‘lgan jurnalist Jamol Qoshiqchi oilasining eʼtirozlariga sabab bo‘ldi. Bundan avval Bayden Saudiya Arabistonini quvg‘indi davlatga aylantirishga vaʼda bergandi”.
Wall Street Journal
Baydenning vaʼdasi (Saudiya Arabistonini quvg‘indi davlatga aylantirish — zamon.uz tahriri) Amerika-Saudiya munosabatlarini keskin nuqtaga borishiga sabab bo‘ldi. Endilikda u podshohlikning 36 yoshli yetakchisi bilan shaxsiy muloqotning AQSHni Yaqin Sharqdagi pozitsiyalarini tiklashiga va Qo‘shma Shtatlardagi yuqori inflyatsiyani jilovlashga yordam berishiga ishonmoqda.
Avvalroq AQSH va Saudiya o‘rtasida 28 ta kelishuv imzolangani to‘g‘risida xabar berilgandi.
