Putin Erdog‘an va Raisiy bilan nimalarni muhokama qiladi?

 

Bugun Tehronda Rossiya, Turkiya va Eron rahbarlari uchrashuvi bo‘lib o‘tadi. Unda tomonlar ikki va ko‘p tomonlama muzokaralar o‘tkazadi.

 

Haftaning asosiy siyosiy voqeasi bo‘lishi kutilayotgan uchrashuv tafsilotlari haqida Kreml matbuot xizmati qo‘shimcha maʼlumot berdi.

 

Unga ko‘ra, RF rahbari Turkiya va Eron yetakchilari bilan yakkama-yakka muloqot o‘tkazadi. Muhokamalar markazida xalqaro maydondagi eng dolzarb masalalar, xususan, Ukraina mavzusi turibdi. Erdog‘an va Putin Ukraina portlaridan g‘alla olib chiqish imkoniyatlarini ham ko‘rib chiqadi.

 

Eron prezidenti Ibrohim Raisiy rossiyalik hamkasbi bilan yadro dasturi masalasini muhokama qiladi. Kremlning qayd etishicha, Moskva Tehronga qo‘yilgan xalqaro cheklovlar taʼsirini kamaytirish tarafdori. Shuningdek, tomonlar o‘zaro munosabatlarni strategik hamkorlik darajasiga ko‘tarmoqchi, bu bo‘yicha yangi davlatlararo shartnoma tayyorlanmoqda. Putin Eron Oliy rahnamosi Oyatulloh Ali Xumayniy bilan ham uchrashishi kutilyapti.

 

Uch tomonlama muzokaralar markazida Suriya turibdi. Ko‘rib chiqiladigan masalalar qatoriga terrorizmni tag-tomiri bilan yo‘qotish, gumanitar yordam ko‘rsatish kabilar kiradi. Bundan tashqari, Suriya tashqi ishlar vazirligi konstitutsiya bo‘yicha muzokaralarni tiklashni ham ko‘tarishini maʼlum qilgan.

 

Avvalroq Eronda yadro quroli ishlab chiqarish uchun barcha imkoniyatlar borligi maʼlum qilingandi.