O‘zbekistonda 6 oy ichida 52 kishi yong‘indan halok bo‘ldi

2022-yilning 6 oyi davomida O‘zbekistonda 4465 ta yong‘in yuz berib, 52 kishi halok bo‘ldi va 101 kishi tan jarohati oldi. Bu haqda AOKAda o‘tkazilgan brifingda FVV Nazorat va profilaktika boshqarmasi boshlig‘i o‘rinbosari Mavlonbek Doschanov ma’lum qildi.

6 oy davomida yuz bergan yong‘inlar 2021-yilning mos davriga nisbatan 525 ta (11 foiz)ga, yong‘inlarda insonlarning halok bo‘lish holatlari 9 ta (15 foiz)ga, insonlarning tan jarohati olish holatlari 36 ta (26 foiz)ga kamaygan. 

Sodir bo‘lgan yong‘inlar ishlab chiqarish korxonalarida 19 foizga, ishlab chiqarish sexlarida 11 foizga, qishloq xo‘jaligi imoratlarida 29 foizga, materiallarni ochiq joyda saqlash joylarida 11 foizga, madaniy-tomosha muassasalarida 40 foizga, ma’muriy-jamoat muassasalarida 15 foizga, aholi yashash joylarida 13 foizga, qurilayotgan imoratlar va foydalanilmayotgan imoratlarda 29 foizga, boshqa obyektlarda 24 foizga, shuningdek, pechlarni qurish va ishlatish qoidalarining buzilishi sababli yuz bergan yong‘inlar 22 foizga, ochiq olovdan ehtiyotsizlik bilan foydalanish oqibatida 28 foizga, bolalar sho‘xligi oqibatida 7 foizga, transport vositalaridan foydalanish va tuzilish qoidalarining buzilishidan 8 foizga, texnologik hodisalar oqibatidagi yong‘inlar 3 foizga kamayishiga erishilgan.

“Biroq kunlarning keskin isib ketishi evaziga fuqarolar tomonidan yong‘in xavfsizligi talablariga rioya qilinmasligi oqibatida yuz berayotgan yong‘inlar tashvishli hisoblanmoqda”, — deyiladi xabarda.

Iyul oyining birinchi o‘n besh kunligida yong‘inlar bilan bog‘liq vaziyat faollashgani kuzatilmoqda. Ushbu davrda sodir bo‘lgan yong‘inlar 579 tani tashkil etib, 95 tasi qurigan o‘simliklarni yonishi, 397 tasi aholi turar joylari va 87 tasi boshqa ob’yektlarga to‘g‘ri kelmoqda.