Lavrov: Yevropaning gazga bo‘lgan ehtiyojini qoplash imkoni bor
Rossiya bosh diplomati yirik loyihaning ishga tushirilmaganini eslatdi.
“Shimoliy oqim-2” Yevropaning gazga bo‘lgan ehtiyojini to‘liq qoplaydi. Bu haqda Rossiya tashqi ishlar vaziri Sergey Lavrov maʼlum qildi.
“Ushbu gaz quvuri Yevropaning barcha ehtiyojlarini qondirishga tayyor holatda. Ammo Yevroittifoqning siyosiy qarorlari tufayli ishga tushirilmagan”, – degan diplomat.
Shuningdek, vazir Siemens turbinalari bo‘yicha moskvaga to‘liq tushuntirish berilmaganini aytgan.
Maʼlumot o‘rnida: “Shimoliy oqim-2” (“Nord stream-2”) Rossiya va Germaniya o‘rtasidagi Boltiq dengizi tubidan o‘tgan magistral gaz quvuri bo‘lib, uzunligi 1 234 kmni tashkil qiladi. Qurilish ishlari 2016 yilda boshlangan bo‘lib, 2021 yilda yakunlangan. Ushbu noyob loyihada quvurlar to‘liq dengiz tubidan o‘tadi hamda Rossiya, Finlyandiya, Shvetsiya, Daniya va Germaniya hududiy suvlariga yotqizilgan.
Rossiya-Ukraina o‘rtasida harbiy mojaro boshlangach, YEI quvurga sanksiya joriy etdi.
Avvalroq Germaniya kansleri Moskvani gaz yetkazib berishda ishonchsiz hamkor sifatida ayblagandi.
