AQSH "olov bilan o‘ynashyapti" (mi?)
Pentagon Pelosining Tayvanga tashrifiga tayyorgarlik ko‘rmoqda
AQSH mudofaa vazirligi Kongressning vakillar palatasi spikeri Nensi Pelosining Tayvanga ehtimoliy tashrifiga tayyorgarlik ko‘rmoqda. Bu haqda Politico gazetasi xabar berdi.
Osiyo bo‘ylab turnega chiqqan siyosatchi bundan oldin Tayvanga borishi haqidagi savolga aniq javob bermagan va buni xavfsizlik masalasi bilan izohlagan. Ammo Pentagon ushbu vaziyatga tayyorgarlikni boshlab yuborgan. Gazeta maʼlumotlariga ko‘ra, barchasi rejadagidek ketsa, Pelosi xonim Taybeyga harbiy samolyotda boradi.
AQSH harbiylari Pekinning orol yaqinida raketa sinovlari o‘tkazishidan xavfsiramoqda. Politico manbalari Tayvan yaqinida uchayotgan Amerika samolyotlariga to‘liq qurollanishga topshiriq berilganini taʼkidlagan.
OAV maʼlumotlariga ko‘ra, hozircha Pelosi Yaponiya, Janubiy Koreya, Malayziya va Singapurga tashrif buyurishni rejalashtirgan.
Avvalroq Si Szinpin Jozef Bayden bilan telefon muloqoti chog‘ida "olov bilan o‘ynashmaslik"ni maslahat bergandi. Bundan tashqari, Xitoy dengiz kuchlari Tayvan yaqinida yirik mashg‘ulotlar boshlagani to‘g‘risida xabar berilgandi.
