Kentukkida dahshatli toshqin: 30 kishi qurbon bo‘lgan
Ayrim joylarda 20 santimetr yomg‘ir yog‘gan.
AQSHning Kentukki shtatida 30 kishi suv toshqini qurboniga aylandi. Rasmiylar jabrlanuvchilar soni yanada oshishidan ogohlantirgan.
Toshqinlar o‘tgan hafta o‘rtalaridan, kuchli yomg‘irlar ortidan boshlangan. Kentukki sharqidagi ayrim joylarda sutkasiga 20 santimetrdan ko‘p yomg‘ir yog‘gan. Uatsburg shahri yaqinidagi kichik daryoda suv darajasi olti futgacha ko‘tarildi. 12 mingdan ortiq xonadon elektrsiz qolgan.
AQSH milliy metereologik xizmati shtat sharqi va markazida toshqinlar xavfi saqlanib qolayotganidan ogohlantirgan.
O‘nlab odamlar bedarak yo‘qolgan, ularni qidirish bir necha haftaga cho‘zilishi mumkin.
“Bu tarixda uchragan eng halokatli va dahshatli toshqinlardan biri bo‘ldi. Hozirda odamlarni qutqarmoqchi bo‘lgan paytimizda ham yomg‘ir tinmayapti”, — degan shtat gubernatori Endi Beshir.
Avvalroq Sochi shahri suv toshqini ostida qolgandi.
