Toshkentda 12 qavatli bino yonib ketdi
Hodisa joyiga FVB rahbariyati, IIB va SSB xodimlari yetib borgan.
Bugun, 5-avgust kuni Toshkent shahrining Chilonzor tumanida ko‘p qavatli uylardan birida yong‘in sodir bo‘ldi. Holat yuzasidan Favqulodda vaziyatlar vazirligi axborot xizmati ma’lumot berdi.
Qayd etilishicha, soat 18:23 da Chilonzor tumani Seul ko‘chasidagi 12 qavatga mo‘ljallangan qurilishi tugallanmagan binoda yong‘in sodir bo‘layotganligi to‘g‘risida shahar FVBga xabar kelib tushgan.
Shunga ko‘ra, 4 ta yong‘in-qutqaruv ekipaji va 2 ta avtonarvon voqea joyiga soat 18:28 da yetib borib, yong‘in soat 18:44 da o‘chirilgan. Shuningdek, hodisa joyiga FVB rahbariyati, IIB va SSB xodimlari yetib borgan.
Dastlabki ma’lumotlarga, ko‘ra yong‘in natijasida binoning 2 qavatida 140 kvadrat metr maydonda qurilish mahsulotlari yonib zararlangan. Yong‘in oqibatida fuqarolarni tan jarohati olish va halok bo‘lish holatlari yo‘q. Hozirda yong‘inning kelib chiqish sababi va keltirilgan moddiy zarar miqdori aniqlanmoqda.
