Toshkent metrosi poyezdida chiroq oʻchib qoldi
Shundan so‘ng yo‘lovchilar bekatda tushirilgan.
Bugun, 16-avgust kuni Toshkent metrosining “Oʻzbekiston” yoʻnalishida harakatlanayotgan poyezd vagonida chiroq oʻchib qoldi.
Metropolitenning maʼlum qilishicha, soat 17:33 lar atrofida “Chorsu” bekatidan “Tinchlik” bekatiga harakatlanayotgan 33-sonli harakat tarkibining vagonlarini yorugʻlik chiroqlari bilan taʼminlash tizimida qisqa muddatli nosozlik yuzaga kelgan.
Mashinist esa belgilangan yoʻriqnomaga asosan, harakat tezligini pasaytirib, “Tinchlik”| bekatiga kirib kelgan va yoʻlovchilarni shu yerda qoldirgan. 2 daqiqadan soʻng kelgan 31-sonli harakat tarkibi bekatdagi barcha yoʻlovchilarni “Beruniy” bekatigacha olib borgan.
“Hozirda barcha poyezdlar belgilangan jadval asosida harakatlanmoqda. Keltirilgan noqulaylik uchun barcha yoʻlovchilardan uzr soʻraymiz”, — deyiladi xabarda.
