AQSH toliblar bilan muzlatilgan aktivlar bo‘yicha muzokaralarni davom ettiradi
Bunga nima sabab bo‘lgani ochiqlandi.
Jozef Bayden administratsiyasi Afg‘onistonning muzlatilgan aktivlarini qaytarish ishini davom ettiradi. Reuters agentligi maʼlumotlariga ko‘ra, bu “Tolibon” va Afg‘oniston markaziy banki tomonidan sekin qadam tashlanayotganiga qaramay amalga oshirilmoqda.
Agentlik maʼlumotlariga ko‘ra, Vashington afg‘onlar orasida qashshoqlik va gumanitar inqirozning kengayishidan xavotir bildirgan. BMT 22.8 million afg‘onistonlik to‘yib ovqatlanmasligini, 8.7 million aholi ochlikda yashashini maʼlum qilgan. hozirda toliblar davlat zaxiralarining 0.1 foizini tasarruf qila oladi. Qolgan qismi AQSH tomonidan muzlatib qo‘yilgan.
Reuters manbalaridan biri “Tolibon”ni harakatsizlikda ayblagan. Shunga qaramay, Kobulda “Al-Qoida” yetakchisi Ayman az-Zavoxiriyning o‘ldirilganidan so‘ng, Davlat departamenti va moliya vazirligi toliblar bilan muzokaralarni davom ettirishga qaror qilgan.
Vashington zaxiralarni Shveysariyadagi trast fondlaridan biriga o‘tkazadi. Bu orqali ular “Tolibon”ni chetlab o‘tib pullarni Afg‘onistonga yo‘naltirmoqchi.
Avvalroq toliblar Moskvaga barter savdosini yo‘lga qo‘yishni taklif qilgandi.
