To‘qayev yangi iqtisodiy yo‘nalishni eʼlon qildi
Uning asosiy maqsadi ochiqlandi.
Qosim-Jo‘mart To‘qayev 1 sentyabr kuni xalqqa murojaati davomida Qozog‘istonning yangi iqtisodiy yo‘nalishini eʼlon qildi.
“Bizning iqtisodiy siyosatimizning asosiy maqsadi — fuqarolarimiz farovonligining sifatli va inklyuziv o‘sishidir. Yangi iqtisodiy yo‘nalishning ustuvor vazifalari: xususiy tadbirkorlik tashabbusini qo‘llab-quvvatlash, yaʼni davlat kapitalizmidan voz kechish va davlatning iqtisodiyotga aralashuvini kamaytirish, raqobatni rivojlantirish, yaʼni barchaga teng imkoniyatlarni yaratishdan iborat”, – degan u.
To‘qayevning fikricha, milliy boylikning adolatli taqsimlanishi ham muhim omil hisoblanadi. Shu maqsadda u hashamat solig‘ini joriy etishni taklif qilgan. Qozog‘iston rahbarining so‘zlariga ko‘ra, qimmat ko‘chmas mulk obyektlari, transport vositalari sotib olinganda hashamat solig‘i solinadi va bu o‘rta sinf vakillariga taalluqli bo‘lmaydi.
Avvalroq To‘qayev Qozog‘istonning yadro xavfsizligi tamoyiliga sodiqligini aytgandi.
