Ishga tushmagan “Shimoliy oqim-2” quvurida favqulodda holat yuzaga keldi
Undan gaz sizib chiqqan.
Daniya hukumati dushanba kuni Bornxolm oroli atrofida “Shimoliy oqim-2” gaz quvuridan gaz sizib chiqqanini maʼlum qildi. Shu sababli kemalar oroldan 5 dengiz mili uzoqlikda o‘tishi tavsiya qilingan.
Germaniya hukumati ushbu holat bo‘yicha daniyaliklar bilan doimiy aloqada ekanini, uning sabablarini o‘rganayotganini taʼkidlagan. Nord Stream AG gaz sizib chiqishini tasdiqladi, ammo batafsil maʼlumotlar berilmagan.
Daniya qirg‘oq qo‘riqlash xizmati navigatsion ogohlantirishlar ishlab chiqqan hamda “Shimoliy oqim -2” atrofida kemalar harakatini taqiqlagan.
Gaz quvuri operatori ushbu loyiha ishga tushmasa-da, uning ichida maʼlum miqdorda gaz bo‘lganini maʼlum qilgan. Ukraina mojarosi boshlanishi arafasida “Shimoliy oqim-2” ichida 300 million kub metr gaz bo‘lgan, ammo Germaniya hukumati 22 fevralda uni ishga tushirishni to‘xtatib qo‘ygandi.
Quvur loyihasi Moskva va Bryussel o‘rtasidagi energetik qarama-qarshilikdagi eng “qaynoq nuqta”lardan biriga aylandi. Shu bilan birga Kreml bir necha bor “Shimoliy oqim-2” orqali gaz yetkazib berishni ko‘paytirishga tayyorligini bildirgan. Ammo Germaniya hukumati quvurni ishga tushmasligini maʼlum qilgandi.
