Qozog‘iston Rossiyaga harbiy texnika beryaptimi?
Mamlakat mudofaa vazirligi bu bo‘yicha bayonot berdi.
Qozog‘iston Rossiyaga harbiy texnik jo‘natayotgani haqida ijtimoiy tarmoqlarda tarqalgan maʼlumotlar haqiqatga to‘g‘ri kelmaydi. Bu haqda stopfake.kz portali xabar berdi.
“Ijtimoiy tarmoqlarda harbiy kolonna harakatlanayotgani haqida tasvirlar tarqaldi. Unga yozilgan izohga ko‘ra, bu Qosim-Jo‘mart To‘qayev va Vladimir Putin kelishuviga ko‘ra bu Qozog‘istondan Rossiyaga ketayotgan texnika hisoblanadi. Ammo bu haqiqatga to‘g‘ri kelmaydi”, – deyiladi xabarda.
O‘z navbatida Qozog‘iston mudofaa vazirligi ham feyk xabarga izoh berdi. Vazirlik Ostona RFga hech qanday texnika jo‘natmayotganini taʼkidlagan. Shu bilan birga mamlakat hududida KXSHT harbiy mashg‘ulotlari o‘tkazilayotgani, harbiy texnika shu munosabat bilan Qozog‘istonning turli nuqtalariga tashlanayotgani qayd etilgan.
Avvalroq Armaniston KXSHT mashg‘ulotlarida ishtirok etmasligi maʼlum bo‘lgandi.
