AQSH Xitoyga chip sotishni yanada cheklamoqchi
Vashington o‘z ittifoqchilarini ham bu cheklovlarga qo‘shilishini istayapti.
AQSH Xitoyga yarimo‘tkazgichlar va mikrosxemalar eksportiga qo‘yilgan cheklovlarni kengaytirmoqchi. Bu haqda The Wall Street Journal xabar berdi.
Gazeta maʼlumotlariga ko‘ra, bu tartib shu haftaning o‘zida joriy etiladi. Jozef Bayden administratsiyasi bir qator muhim ittifoqchilarni ham ushbu sanksiyalarga qo‘shilishga ko‘ndirishga harakat qilmoqda.
AQSH, Yaponiya, Janubiy Koreya va boshqa davlatlarning chip eksportini qo‘shma nazorat qilishi Xitoyning o‘z mikrosxemalarini ishlab chiqarishini jiddiy cheklab qo‘yishi mumkinligi qayd etilgan.
Nashr suhbatdoshlari sanksiyalar xotira chiplari, kvant kompyuterlari va “mikrosxemalar yaratish uchun eng ilg‘or uskunalar”ni ishlab chiqarishga taʼsir ko‘rsatishini taʼkidlagan.
Avvalroq AQSH Xitoy va Rossiyaga ayrim turdagi yarimo‘tkazgichlarni sotishni taqiqlagandi.
