Rishi Sunak yana bosh vazir bo‘lishga urinib ko‘radi
O‘tgan safar u Liz Trassga mag‘lub bo‘lgandi.
Buyuk Britaniya sobiq moliya vaziri Rishi Sunak yana bosh vazirlikka nomzodini ilgari surdi. Uni konservatorlar partiyasining 100 dan ortiq deputati qo‘llab-quvvatlagan.
Sobiq vazir boshqa nomzodlar 100 ta ovoz to‘play olmasa, avtomatik tarzda hukumat rahbariga aylanadi. Ammo bosh vazirlik uchun kurashga Boris Jonson ham qo‘shilishi mumkin. Hozirda faqatgina Vakillar palatasi rahbari Penni Mordont saylovda ishtirok etishini eʼlon qilgan.
Turli maʼlumotlarga ko‘ra, Jonsonni 67 deputat qo‘llab-quvvatlashi aniq. Uning ittifoqchisi Jeyms Daddrij sobiq bosh vazir yuztadan ortiq ovoz to‘play olishiga ishonishini aytgan.
Jonson Karib orollaridagi taʼtilini bekor qilib, Londonga uchib kelayotgani haqida xabarlar tarqaldi.
Shu haftada Liz Trass bosh vazirlikdan isteʼfoga chiqdi. U 45 kun davomida hukumatni boshqargan. Saylovda aynan Rishi Sunak Trass xonimning asosiy raqobatchisi bo‘lgan.
Avvalroq Buyuk Britaniyada saylov sanasi maʼlum qilingandi.
