Toshkentda “hunar ko‘rsatgan” haydovchi jarimaga tortildi
Bugun uning ishi sudda ko‘rib chiqildi.
Avvalroq Toshkent shahrida YPX inspektorlarining qonuniy talabini bajarmagan Neksiya–2 haydovchisining avtomashina oynalari sindirilgani haqida xabar qilgandik. Shahar sudlari mazkur holatdagi huqubuzarga oid ma’muriy huquqbuzarlik to‘g‘risidagi ish yuzasidan rasmiy axborot berdi.
Qayd etilishicha, bugun, 3-noyabr kuni jinoyat ishlari bo‘yicha Yunusobod tuman sudida Ma’muriy javobgarlik to‘g‘risidagi kodeksning 135-moddasi (yo‘l harakati qoidalarida nazarda tutilgan hujjatlari bo‘lmagan shaxslarning transport vositalarini boshqarishi) 2-qismi hamda 194-moddasi (ichki ishlar organlari xodimining qonuniy talablarini bajarmaslik) 1-qismi bilan huquqbuzar deb topilgan A.X.ga oid ma’muriy huquqbuzarlik to‘g‘risidagi ish ko‘rib chiqilgan.
Ish hujjatlariga ko‘ra, huquqbuzar 2022-yil 1-noyabr kuni soat 17:00 larda o‘z boshqaruvida bo‘lgan Neksiya–2 rusumli avtomashinasini Yunusobod tumani Shahrisabz va Amir Temur ko‘chalari kesishgan chorrahasida hech qanday hujjatlarsiz boshqarib ketayotgan vaqtida IIO xodimlari tomonidan jezl yordamida to‘xtatilgan.
Haydovchi esa to‘xtash ishorasiga amal qilmay, harakatni davom ettirgan va voqea joyidan ketib qolgan. Ko‘rilgan chora-tadbirlar natijasida haydovchi to‘xtatilib, hujjatlarini tekshirish jarayonida unda avtomashina boshqarish uchun hech qanday hujjatlari mavjud emasligi aniqlangan.
Sudning qaroriga ko‘ra, A.X. Ma’muriy javobgarlik to‘g‘risidagi kodeksning 135-moddasi 2-qismi hamda 194-moddasi 1-qismida nazarda tutilgan ma’muriy huquqbuzarlikni sodir qilgan deb topilgan.
Ma’muriy javobgarlik to‘g‘risidagi kodeksning 34-moddasiga asosan uzil-kesil, bazaviy hisoblash miqdorining 10 baravari miqdorida jarima jazosi tayinlandi.
“Ushbu qaror ustidan apellyatsiya shikoyati (protesti) qonunchilikda belgilangan tartib va muddatda berilishi mumkin”, — deyiladi xabarda.
