Toshkent metrosida bir tomonlama harakat to‘xtab qoldi
Holatga rasmiylar munosabat bildirdi.
Bugun, 7-noyabr kuni Toshkent metrosining “Chilonzor” yo‘nalishida nosozlik yuz berdi.
Ma’lum bo‘lishicha, soat 19:10 da “Chilonzor” yo‘nalishi Sergeli yo‘lining 5-bekatida poyezd harakat yo‘lida texnik nosozlik holati kuzatilgan, buning natijasida bekatda bo‘lgan 17-sonli harakat tarkibi harakatlana olmagan. Shundan so‘ng xavfsizlikni ta’minlash maqsadida harakat vaqtinchalik to‘xtatilgan.
Ushbu vaqt oralig‘ida “Buyuk Ipak yo‘li” hamda “Olmazor” bekatlari oralig‘ida poyezdlar jadval asosida harakatlangan. “Olmazor” hamda Sergeli yo‘li 5-bekat oralig‘ida ushbu nosozlik holati tuzatilgunga qadar bir tomonlama harakat amalga oshirilgan. Soat 19:37 da kuzatilgan nosozlik mutaxassislar tomonidan bartaraf etilgan va poyezdlar harakatlana boshlagan.
Hozirda barcha poyezdlar belgilangan jadval asosida harakatlanmoqda.
