Yevropa Belarusning Ukraina nizosidagi ishtirokini tekshirmoqchi
Ushbu masala Bryusselning xavotirlariga sabab bo‘lmoqda.
Yevroittifoq belaruslik muxolifatchi Svetlana Tixanovskaya bilan Minskning Rossiya-Ukraina mojarosidagi ishtiroki darajasini o‘rganadi. Bu xaqda YеI diplomatiyasi rahbari Jozep Borrel maʼlum qildi.
“Tixanovskaya xonim kengash yig‘ilishiga (bugun YеI tashqi siyosiy idoralari rahbarlari yig‘ilishi o‘tkaziladi — tahririyat) Belarus muxolifati yetakchisi sifatida taklif qilingan. u biz bilan Belarusdagi vaziyat yuzasidan fikr almashadi. Minskning Ukrainadagi ishtiroki darajasini bilish muhim, bu bizni xavotirga solmoqda. Ular Rossiya talab qilgan har qanday yordamni ko‘rsatyapti, ammo hozircha belaruslik harbiylarning nizoda to‘g‘ridan to‘g‘ri ishtirok etayotgani haqida hech qanday dalillar yo‘q”, – degan u.
Ukraina va qator G‘arb davlatlari Minsk Rossiyani Ukrainaga qarshi harbiy harakatlarda faol qo‘llab-quvvatlab kelayotganini taʼkidlaydi. Bundan avval Belarus Prezidenti Aleksandr Lukashenko ham Moskvaga ayrim turdagi harbiy yordam ko‘rsatayotganini, ammo belaruslik harbiylar jangovar harakatlarda ishtirok etmayotganini aytgandi.
