Gimnastika markazlarining asosiy vazifalari belgilandi
Markaz bitiruvchilariga beriladigan diplom bilan mehnat faoliyatini amalga oshirish mumkin.
Prezident qarori bilan Nukus, Samarqand va Farg‘ona shaharlarida Gimnastika sport turlariga tayyorlash markazlari tashkil etiladi. Mazkur Gimnastika markazlari ixtisoslashtirilgan davlat sport-taʼlim muassasasi hisoblanib, gimnastika sport turlariga ixtisoslashtirilgan sport maktabiga ega bo‘ladi. Ushbu Gimnastika markazlari o‘z faoliyatini 2024/2025-o‘quv yilidan boshlaydi.
Qayd etilishicha, o‘quvchilarning umumiy kontingenti jami 132 nafarni tashkil etib, ular 1–11-sinf o‘quvchilaridan iborat bo‘ladi. Gimnastika markazlarining 1-sinfiga gimnastika sport turlariga ixtisoslashtirilgan sport maktablarida shug‘ullangan, yuqori iqtidorga ega va o‘qish istagini bildirgan o‘quvchilar tanlov asosida qabul qilinadi. O‘quvchilar ularga eng yaqin joylashgan maktablarda umumtaʼlim dasturlari bo‘yicha o‘qitiladi.
Gimnastika markazlarining o‘quv dasturini o‘zlashtirgan va yakuniy davlat attestatsiyasidan o‘tgan 11-sinf bitiruvchilariga davlat namunasidagi diplom beriladi. Mazkur diplom berilgan mutaxassislik (trener, trener-seleksioner) bo‘yicha mehnat faoliyatini amalga oshirish yoki taʼlimning keyingi bosqichlarida o‘qishni davom ettirish huquqini beradi.
