Rossiyalik alpinist Natalya Nagovitsinaning halok bo‘lgani rasman e’lon qilindi
Nagovitsina 12-avgust kuni oyog‘ini sindirib, 7200 metr balandlikda qolib ketgan edi.
Qirg‘iziston alpinizm va toqqa chiqish federatsiyasi prezidenti Eduard Kubatov ma’lum qilishicha, rossiyalik alpinist Natalya Nagovitsina vafot etgan deb rasman e’lon qilindi.
2-sentabr kuni dron yordamida ikki marotaba amalga oshirilgan qidiruv jarayonlarida Nagovitsinaning hayot izlariga duch kelinmadi. Shundan so‘ng qutqaruv operatsiyasi to‘xtatilgani bildirildi.
47 yoshli sportchi 12-avgust kuni “G‘alaba” cho‘qqisidan (7439 metr) tushish vaqtida oyog‘ini sindirib, 7200 metr balandlikda qolib ketgan. Uning yonida faqat oz miqdorda suv zaxirasi bo‘lgan.
Nagovitsinani qutqarish uchun uch marta urinish qilingan, biroq barchasi muvaffaqiyatsiz yakunlangan. Ulardan biri davomida italiyalik alpinist Luka Sinijiglye ham halok bo‘lgan.
Kubatovning ta’kidlashicha, tarix davomida “G‘alaba” cho‘qqisida birorta ham muvaffaqiyatli qutqaruv amaliyoti o‘tkazilmagan. Bu cho‘qqi O‘rta Osiyodagi eng xavfli va murakkab ko‘tarilish yo‘nalishlaridan biri hisoblanadi.
