Andijonda yuk mashinasi urib yuborishi oqibatida 8 yoshli bola vafot etdi
Yuk mashinasi harakatlanib ketayotgan vaqtda bola piyodalar o‘tish joyidan yugurib chiqqan.
Joriy yilning 24-fevral kuni soat 15:56 larda Andijon viloyati Baliqchi tumani “Eski Markaz” MFY hududidan o‘tgan D-105 avtomobil yo‘lining “Farg‘ona halqa yo‘li” 103-kilometrida yo‘l-transport hodisasi sodir bo‘ldi. Bu haqda Andijon viloyati YHXB matbuot xizmati xabar berdi.
Dastlabki ma’lumotlarga ko‘ra, 2002-yilda tug‘ilgan A.J. boshqaruvidagi “ZIL-130” rusumli yuk transport vositasi tartibga solingan chorrahada harakatlanib kelayotgan vaqtda piyodalar o‘tish joyidan yugurib chiqqan 2017-yilda tug‘ilgan H.M.ni urib yuborgan. Shundan so‘ng haydovchi rul boshqaruvini yo‘qotib, chorrahada to‘xtab turgan “Cobalt” rusumli transport vositasi bilan to‘qnashgan.
Hodisa oqibatida voyaga yetmagan piyoda H.M. olgan tan jarohatlari bilan shifoxonaga yetkazilgan. Ko‘rsatilgan tibbiy muolajalarga qaramasdan, u vafot etgan.
Mazkur holat yuzasidan Baliqchi tumani IIB huzuridagi Tergov bo‘linmasi tomonidan O‘zbekiston Respublikasi Jinoyat kodeksining 266-moddasi 2-qismi (transport vositalari harakati yoki ulardan foydalanish xavfsizligi qoidalarini buzish odam o‘limiga sabab bo‘lishi) bilan jinoyat ishi qo‘zg‘atilib tergov harakatlari olib borilmoqda.
