Qo‘qondagi ko‘p qavatli uyda portlash yuzasidan jinoyat ishi ochildi
Tergov-tezkor guruhi tuzilib, hodisa sabablarini aniqlash va hujjatlashtirish ishlari boshlangan.
Farg‘ona viloyati IIV Tergov departamenti xabariga ko‘ra, Farg‘ona viloyati Qo‘qon shahridagi ko‘p qavatli uylardan birida sodir bo‘lgan portlash yuzasidan jinoyat ishi qo‘zg‘atildi.
Farg‘ona viloyati IIB 2-mintaqaviy hudud Tergov bo‘limi tomonidan jinoyat ishi Jinoyat kodeksi 259-moddasi 2-qismi “a” bandi (yong‘in xavfsizligi qoidalarini buzish odam o‘lishiga sabab bo‘lishi) bilan qo‘zg‘atilib, Tergov departamenti nazoratiga olingan.
Ichki ishlar vaziri o‘rinbosari Ramazon Ashropov boshchiligida hodisa joyida tergov-tezkor guruhi tuzilib, mas’ul xodimlarga hodisa joyini Jinoyat-protsessual kodeksi talablariga muvofiq hujjatlashtirish, ish uchun ahamiyatga ega bo‘lgan narsa va buyumlarni olish, guvohlardan batafsil ko‘rsatmalar olish, hodisaning kelib chiqish sabablarini aniqlash va boshqa zarur tergov harakatlarini amalga oshirish topshiriqlari berildi.
Avvalroq, 25-fevral kuni Qo‘qon shahridagi “Bo‘ston” mahalla fuqarolar yig‘ini hududida joylashgan ko‘p qavatli uylardan birida portlash sodir bo‘lgani, baxtsiz hodisa natijasida bir fuqaro beton qoplama ostida qolib, voqea joyida vafot etgani haqida xabar berilgan edi. Boshqa shaxslarning jarohat olgani to‘g‘risida ma’lumot kelib tushmagan. Hodisa oqibatida bir nechta xonadonlarga zarar yetgan.
