“Arzimas jarima” bilan qutildim degan haydovchi 10 sutkaga qamaldi
Ijtimoiy tarmoqlarda “kichik jarima bilan qutildik” deya bayonot bergan haydovchi ishi kassatsiya tartibida qayta ko‘rib chiqildi.
Ijtimoiy tarmoqlarda YPX xodimining to‘xtash ishorasiga bo‘ysunmasdan harakatlangan haydovchi hamda xodim tomonidan maxsus tayoq (palkasi) uloqtirilgani aks etgan video keng muhokamalarga sabab bo‘lgan edi. Oradan ko‘p o‘tmay, mazkur haydovchining yangi videosi tarqalib, unda u sodir etgan qoidabuzarligini “arzimas jarima” bilan yakunlangani haqida faxrlanib gapirgani aks etgan.
Xabar qilinishicha, 2003-yilda Toshkent shahrida tug‘ilgan, muqaddam ma’muriy javobgarlikka tortilgan A. Jumayevga nisbatan Jinoyat ishlari bo‘yicha Mirzo Ulug‘bek tuman sudining 2026-yil 16-yanvardagi qarori ustidan Mirzo Ulug‘bek tumani prokuraturasi tomonidan kassatsiya tartibida protest kiritilgan.
Mazkur ish Toshkent shahar sudining jinoyat ishlari bo‘yicha sudlov hay’atida kassatsiya tartibida qayta ko‘rib chiqildi. Natijada birinchi instansiya sudining jarima qo‘llash haqidagi qarori bekor qilindi. Bu haqda Oliy sud matbuot xizmati xabar berdi.
Sud qaroriga muvofiq, A. Jumayevga Ma’muriy javobgarlik to‘g‘risidagi kodeksning 195-2-moddasi (huquqni muhofaza qiluvchi organ xodimlarining foto va/yoki video tasvirini ularning obro‘sizlantirilishiga olib keladigan tarzda buzib tarqatish) bilan 10 sutka muddatga ma’muriy qamoq jazosi tayinlandi.
