Har qanday tajovuz javobsiz qolmaydi — Eron AQSh va Isroilni ogohlantirdi
Tashqi ishlar vazirligi Isroilga yordam ko‘rsatadigan Yaqin Sharqdagi har qanday baza Eron nishoniga aylanishini ma’lum qildi.
Eron Tashqi ishlar vazirligi AQSh va Isroilga nisbatan keskin ogohlantirish bilan chiqib, Isroilga harbiy yoki logistik yordam ko‘rsatayotgan Yaqin Sharqdagi har qanday baza Eron nishoniga aylanishini ma’lum qildi. Bu haqda Eronning rasmiy axborot manbalaridan biri — Tasnim xabar berdi.
Bayonotda ta’kidlanishicha, mazkur harakatlar AQSh va Isroil uchun “katta saboq” bo‘ladi. Eron TIV tarixiy tajribaga tayanib, eronliklar hech qachon xorijiy tajovuzga bo‘ysunmaganini va bu safar ham javob qat’iy bo‘lishini qayd etdi.
“Eron muzokaralarga ham, o‘zini himoya qilish uchun harbiy choralar ko‘rishga ham tayyor. Turli bahonalar bilan amalga oshiriladigan har qanday hujum javobsiz qolmaydi. Biz hududiy yaxlitligimiz va suverenitetimizni himoya qilish uchun barcha mavjud kuch va resurslarni safarbar qilamiz”, deyiladi vazirlik bayonotida.
Shuningdek, Eron BMT va boshqa xalqaro tashkilotlarni vaziyatga munosabat bildirishga chaqirib, BMT Xavfsizlik Kengashi a’zolari mojaroni to‘xtatish bo‘yicha o‘z majburiyatlarini bajarishi lozimligini ta’kidladi.
Ma’lumot uchun, 28-fevral kuni AQSh prezidenti Donald Trump AQSh Isroil bilan hamkorlikda Eronga qarshi keng ko‘lamli harbiy operatsiya boshlanganini e’lon qilgan edi. Shundan so‘ng Tehron, Isfahon, Karaj va Kermonshoh viloyatida portlashlar qayd etilgani haqida xabarlar tarqaldi.
