Rossiya Tashqi ishlar vazirligi Yaqin Sharqdagi keskinlikni zudlik bilan yumshatishga chaqirdi

 

Rossiya Tashqi ishlar vazirligi Eron atrofida yuzaga kelgan vaziyatni zudlik bilan siyosiy va diplomatik yo‘lga qaytarish zarurligini ma’lum qildi. Tegishli bayonot vazirlik rasmiy saytida e’lon qilindi.

 

Bayonotda qayd etilishicha, Moskva avvalgidek xalqaro huquq, o‘zaro hurmat va manfaatlar muvozanatiga asoslangan tinch yechimlarni izlashga ko‘maklashishga tayyor. Rossiya tomoni mojaroni kuch ishlatish orqali hal etishga urinishlar mintaqaviy va global xavfsizlikka jiddiy tahdid solishini ta’kidladi.

 

Rossiya TIV 28-fevral kuni AQSh va Isroil tomonidan Eron hududiga havo hujumlari uyushtirilganini qayd etib, mazkur harakatni suveren va mustaqil davlatga nisbatan oldindan rejalashtirilgan qurolli tajovuz sifatida baholadi. Vazirlik fikricha, bunday harakatlar xalqaro huquqning asosiy tamoyillari va normalariga zid hisoblanadi.

 

Moskva, shuningdek, Vashington va Tel-Avivni mintaqani gumanitar, iqtisodiy hamda ehtimol radiologik falokat yoqasiga olib kelayotgan xavfli sarguzashtda aybladi. Bayonotda hujumlar yangilangan muzokara jarayoni fonida va harbiy to‘qnashuvdan manfaatdor emaslik haqidagi signal va kafolatlarga qaramay amalga oshirilgani alohida qayd etildi.

 

Rossiya tomoni Yadro qurolini tarqatmaslik to‘g‘risidagi shartnoma tamoyillariga putur yetkazilishi mumkinligidan xavotir bildirdi. Xususan, MAGATE kafolatlari ostidagi yadroviy inshootlarga zarba berish qabul qilib bo‘lmas amaliyot ekani ta’kidlandi.

 

Rossiya Tashqi ishlar vazirligi xalqaro hamjamiyatni, jumladan BMT va MAGATE rahbariyatini Yaqin Sharqdagi vaziyatga xolis va murosasiz baho berishga hamda tinchlik va barqarorlikni ta’minlashga qaratilgan choralarni ko‘rishga chaqirdi.