Toshkentda YPX xodimining o‘limiga sabab bo‘lgan o‘quvchi BMW’ni olib qochgani aniqlandi
U tanishining opasiga tegishli yuvish shoxobchasida kaliti bilan qoldirilgan BMW rusumli avtomobilni haydab ketgan.
Toshkent shahri Mirobod tumanida yo‘l-patrul xizmati (YPX) inspektori ishtirokida sodir bo‘lgan og‘ir yo‘l-transport hodisasi yuzasidan jinoyat ishi qo‘zg‘atildi.
Tergov hujjatlariga ko‘ra, 2010-yilda tug‘ilgan, maktabning 10-sinf o‘quvchisi bo‘lgan voyaga yetmagan shaxs 25-fevral kuni soat 21:30 larda tanishining opasiga tegishli avtomobil yuvish shoxobchasida kaliti bilan qoldirilgan BMW rusumli avtomobilni haydab ketgan.
Ma’lum qilinishicha, gumonlanuvchi Mirobod tumani Nukus ko‘chasida harakatlanayotgan vaqtida transport oqimini tartibga solish maqsadida to‘xtash ishorasini bergan YPX inspektori Hosilbek Eshnazarovning qonuniy talabiga bo‘ysunmagan. Haydovchilik guvohnomasi hamda transport vositasiga oid hujjatlarga ega bo‘lmagan voyaga yetmagan shaxs javobgarlikdan qochish maqsadida boshqa avtomobillarni keskin aylanib o‘tib, avariyaviy vaziyat yuzaga keltirgan hamda xizmat vazifasini bajarayotgan inspektorni urib yuborgan.
Ko‘rsatilgan zarur tibbiy yordamga qaramay, YPX inspektori 27-fevral kuni vafot etgan.
Dastlabki tergov davomida voyaga yetmagan shaxs harakatlarida transport vositasini olib qochish hamda jabrlanuvchining o‘limiga sabab bo‘lgan qasddan badanga og‘ir shikast yetkazish alomatlari mavjudligi aniqlangan. U Jinoyat kodeksining 267-moddasi 1-qismi va 104-moddasi 3-qismi “d” bandida nazarda tutilgan jinoyatlarni sodir etganlikda gumon qilinuvchi sifatida jalb etilgan.
Hozirda gumonlanuvchi Jinoyat-protsessual kodeksining 221-moddasi tartibida ushlangan. Tergov harakatlari Bosh prokuratura tomonidan alohida nazoratga olingan.
