BMW urib ketishi oqibatida halok bo‘lgan YPX xodimining oilasiga Toshkentdan uy berildi
Hosilbek Eshnazarovning xotirasiga bag‘ishlab yodgorlik majmuasi ochildi.
Toshkent shahar IIBBda xizmat vazifasini bajarish chog‘ida halok bo‘lgan kichik serjant Hosilbek Eshnazarovning xotirasiga bag‘ishlab yodgorlik majmuasi ochildi va oilasiga Prezident qarori bilan 3 xonali uy berildi. Bu haqda Ichki ishlar vazirligi xabar berdi.
Marosimda Ichki ishlar vazirligi rahbariyati, poytaxt jamoatchiligi, xodimning safdoshlari va oila a’zolari ishtirok etgan. Tadbirda Ichki ishlar vaziri tomonidan Hosilbekning mashaqqatli xizmat faoliyati, jasorati va Prezident tomonidan e’tirof etilganligi ta’kidlangan.
Shuningdek, davlat rahbarining tashabbusi bilan Hosilbek “Jasorat” medali bilan mukofotlanib, medal uning otasiga topshirilgan. Eshnazarovlar oilasi bundan tashqari doimiy ijtimoiy himoyaga ega bo‘lishi ta’minlanishi aytilgan.
Xabarda qayd etilishicha, Qashqadaryo viloyatining G‘uzor tumanidagi 62-maktabda esa xodim xotirasiga yodgorlik o‘rnatiladi.
2026-yil 25-fevral kuni Mirobod tumanida voyaga yetmagan Doniyor Turg‘unov tomonidan avtomashinada urib ketilishi natijasida Eshnazarov halok bo‘lgan. Jinoyat ishi doirasida Turg‘unov Jinoyat kodeksining 267-moddasi 1-qismi (transport vositasini olib qochish) va 104-moddasi 3-qismi “d” bandi bo‘yicha gumon qilinuvchi sifatida jalb etilgan.
Sudning 28-fevral kungi ajrimi bilan Turg‘unovga nisbatan “qamoqqa olish” ehtiyot chorasi qo‘llanib, tergov ustidan nazorat Bosh prokuror tomonidan o‘rnatilgan.
