Xorijlik fuqaro O‘zbekistonga sport ozuqasi ko‘rinishida sintetik giyohvandlik moddasini olib kirmoqchi bo‘ldi
Mazkur giyohvand moddalarni qabul qilib olishi kerak bo‘lgan shaxs Bektemir tumanida qo‘lga olingan.
Toshkent aeroportida Bishkekdan uchib kelgan qo‘shni davlat fuqarosi bojxonadan “yashil” yo‘lak orqali harakatlanib, jomadonida sintetik giyohvandlik vositalarini olib kirishga uringani fosh qilindi. Bu haqda O‘zbekiston Davlat bojxona qo‘mitasi xabar berdi.
Qo‘mita xabarida qayd etilishicha, sport ozuqasi sifatida olib o‘tilayotgan 2 ta qutidagi 684 dona kapsula tarkibida 560,75 gr. “alfa-PVP” sintetik giyohvandlik moddasi mavjudligi aniqlangan.
Mazkur jinoyatning tarmoqlarini to‘liq o‘rganish maqsadida Toshkent shahrida tezkor tadbir o‘tkazilgan. Natijada giyohvand moddalarni qabul qilib olishi kerak bo‘lgan shaxs ham Bektemir tumanida qo‘lga olingan.
“Mazkur shaxsning xonadoni tekshirilganda 114 dona kapsulada taxminan 80 gr. og‘irlikdagi “alfa-PVP” sintetik giyohvandlik moddasi va ularni tarqatish uchun hozirlangan 37 dona o‘ramchalar, 2 gr. og‘irlikdagi “marixuana”, 2 dona o‘ramda 30 gr. og‘irlikda boshqa turdagi sintetik narkotik modda, 4 dona elektron tarozi, izolentalar va zip paketlar mavjudligi aniqlanib, daliliy ashyo tariqasida olindi”, deyiladi qo‘mita xabarida.
Avvalroq, Surxondaryo viloyatida maktab o‘qituvchisining 14 dona o‘ramga joylangan 14 kg. 680 gr. og‘irlikdagi "opiy" giyohvandlik vositasini 180 ming AQSH dollariga sotayotgan vaqtida qo‘lga olingani xabar berilgandi.
Hozirda har ikkala holat yuzasidan bojxona organlari tomonidan jinoyat ishlari qo‘zg‘atildi.
