Isroilning zarbalari oqibatida Bayrutda sakkiz kishi halok bo‘ldi
Isroilning ushbu hujumi suiqasd sifatida baholanmoqda.
Payshanba kuni Bayrutning sohil hududi — Ramlet al-Baydada Isroil tomonidan amalga oshirilgan “double-tap” (ketma-ket ikki zarba) hujumi oqibatida sakkiz kishi halok bo‘ldi, 31 kishi yaralandi. Bu haqda Livan Sog‘liqni saqlash vazirligiga tayanib, Al Jazeera ma’lum qildi.
Nashrning yozishicha, Isroilning mazkur harakati navbatdagi suiqasdga o‘xshaydi. Ushbu hududda bombardimonlardan qochib kelgan ko‘chirilgan oilalar vaqtincha boshpana topgan bo‘lgan.
“Ramlet al-Baydadagi guvohlarning aytishicha, ular chodirlarida uxlab yotgan paytda qiruvchi samolyotlarning shovqini ularni uyg‘otgan. Keyin portlash bo‘lgan, ular chodirlaridan endi bosh chiqarganlarida esa ikkinchi zarba berilgan”, deyiladi xabarda.
Pettning aytishicha, bu hujum yana bir Isroil suiqasd zarbasi bo‘lishi mumkin. U, ayniqsa, odatda nishonga olinadigan hududlardan tashqarida va Isroil evakuatsiya qilishni buyurgan zonalardan ham tashqarida amalga oshirilgani bilan e’tiborni tortmoqda.
Livan Milliy axborot agentligi ham Isroil kuchlari mamlakat janubida va boshqa hududlarda amalga oshirgan hujumlar oqibatida yana kamida yetti kishi halok bo‘lganini bildirdi.
Livan sog‘liqni saqlash vazirligi ma’lumotiga ko‘ra, Bayrutdan taxminan 10 kilometr janubda joylashgan Aramoun shahriga Isroil hujumi natijasida uch kishi halok bo‘lgan, bir bola jarohatlangan.
Bint-Jbeil tumanidagi Deir Antar shahriga uyushtirilgan Isroil hujumida ikki kishi halok bo‘lgan, olti kishi yaralangan. Yana ikki kishi Maarakah–Tir chorrahasida nishonga olingan to‘rt qavatli binoga zarba berilishi oqibatida halok bo‘lgan.
Payshanba kuni ertaroq Tir tumanidagi Burj Shamali hududiga qilingan hujumda bir ona va uning uch o‘g‘li halok bo‘lgan. Baalbek tumanidagi Shaath shahriga qilingan Isroil hujumida esa sakkiz kishi hayotdan ko‘z yumgan.
Qayd etilishicha, so‘nggi hujumlar Livan sog‘liqni saqlash idoralari 28 fevraldan buyon Isroil zarbalari oqibatida halok bo‘lganlar soni 634 kishiga yetganini ma’lum qilganidan keyin sodir bo‘lgan.
Bu paytda Eron va “Hizbulloh” Isroilga qarshi muvofiqlashtirilgan bir nechta zarba to‘lqinlarini amalga oshirgan. Isroil Mudofaa armiyasi esa bu zarbalar qaytarilganini ma’lum qilgan.
