Eron Ali Larijoniyning o‘limi uchun Isroildan qasos olishini ma’lum qildi
Isroil hujumlari oqibatida Larijoniyning o‘g‘li va uning o‘rinbosari ham halok bo‘lgan.
Eron rasmiylari Isroil hujumlari natijasida Milliy xavfsizlik kengashi kotibi Ali Larijoniy halok bo‘lganini tasdiqlab, keskin javob qaytarilishini ma’lum qildi.
Eron Islom inqilobi qo‘riqchilari korpusi bayonotiga ko‘ra, Isroilning havo zarbalari oqibatida Larijoniy bilan birga uning o‘g‘li Murtazo hamda xavfsizlik xizmati bo‘yicha muovini Alirizo Bayat ham halok bo‘lgan.
Ma’lum qilinishicha, Larijoniy Tehron yaqinidagi Pardis tumanida joylashgan qizning uyida bo‘lgan vaqtda hujumga uchragan. U yerda u o‘g‘li, yordamchilaridan biri va bir necha tansoqchilari bilan birga bo‘lgan.
Islom inqilobi qo‘riqchilari korpusi bayonotida ushbu hodisa “javobsiz qolmasligi” ta’kidlanib, Larijoniy va boshqa halok bo‘lganlar uchun “intiqom” olinishi aytilgan.
Eron Prezidenti Mas’ud Pezeshkiyon ham mazkur voqeaga munosabat bildirib, aybdorlar qattiq jazolanishini ta’kidladi.
“Eron zaminining shahidlari qoni bilan qo‘llarini bulg‘aganlar muqarrar ravishda jazoga tortiladi”, — dedi Prezident.
Ali Larijoniy yadroviy muzokaralar bo‘yicha sobiq vakil va Eron oliy rahbariga yaqin siyosiy arboblardan biri sifatida tanilgan. U so‘nggi bor 13-mart kuni Tehronda o‘tkazilgan Quds kuni tadbirlarida ko‘rinish bergan edi.
Shu kuni AQSH tomonidan Eronning yuqori lavozimdagi harbiy va razvedka amaldorlari, jumladan, Larijoniy haqida ma’lumot uchun 10 million dollargacha mukofot e’lon qilingani ham xabar qilingan.
