AQSh Eronga zarbalarni davom ettiradi, sulh faqat energetika obyektlariga taalluqli — Semafor
Shuningdek, AQSH rasmiysi “Epik g‘azab” operatsiyasining dastlabki bosqichlari davom etishini bildirgan.
AQSh Eronga zarbalarni davom ettiradi, tanaffus esa faqat Tehronning energetika obyektlariga qilingan hujumlarga taalluqli bo‘ladi. Bu haqda Semafor nashri AQSh rasmiysiga tayanib xabar berdi.
Mazkur ma’lumot AQSh prezidenti Donald Tramp noma’lum eronlik rasmiylar bilan o‘tkazgan “samarali” muzokarasidan so‘ng e’lon qilindi.
Avvalroq Tramp Eronning elektr stansiyalari va energetika infratuzilmasiga zarba berish rejasini besh kunga to‘xtatgandi. Keyinchalik Eron AQSh bilan muzokaralar olib borilganini rad etdi.
“Besh kunlik hujumlarni to‘xtatish faqat ularning energetika obyektlariga nisbatan amal qiladi”, — degan AQSh rasmiysi Semaforga.
Rasmiyning qo‘shimcha qilishicha, tanaffus harbiy obyektlar, dengiz kuchlari, ballistik raketalar va mudofaa sanoati infratuzilmasiga taalluqli emas.
“Epik g‘azab operatsiyasining dastlabki bosqichlari davom etadi”, — degan u.
Shuningdek, Semafor xabariga ko‘ra, Isroil Vashington va Tehron o‘rtasidagi muzokaralarda ishtirok etmagan.
Reuters agentligi ushbu xabarni darhol mustaqil tasdiqlay olmagan. Oq uy, AQSh Davlat departamenti va Pentagon ish vaqtidan tashqari berilgan so‘rovlariga javob bermagan.
